Carmiña, Bonitiño e Clink visitan Viladonga.

Carmiña , Bonitiño e Clink visitaron Viladonga.

Os nosos amigos finalmente fixeron a ansiada visita ao Castro de Viladonga.

Remata así a historia do noso PDI 'Os Castros, un nome misterioso' no que traballamos todos xuntos con moita ilusión.

 

VAI REMATANDO O CURSO

 É moi difícil resumir con xustiza todo o traballo realizado ao redor do PDI e dos libros (por exemplo todo o traballo relacionado con Educación responsable) neste curso escolar. Quedan no recordo moitas LECTURAS COMPARTIDAS, entre o alumnado de diferentes niveis e tamén con outras asociacións, por exemplo as visitas que nos realizaron os usuarios da fundación EU SON, que visitaron o noso cole para compartir lecturas en máis de unha ocasión. E nós aínda temos pendente unha visita á Escola Infantil na que compartiremos lecturas cos máis pequeniños.

A aula de POLOS CREATIVOS encheuse de creatividade durante este curso, con actividades relacionadas con PDI e outras que non.

Paseamos moito. Fomos visitar AS TETAS DA VINCULEIRA, esas dúas mámoas que están aquí nos Castros moi pretiño do cole. Din que son a entrada ao Castro. vimos a PENA DO NENO e xa sabemos por que ao noso cole sempre se lle chamou o COLE DOS CASTROS. 

Sabemos moito máis da nosa historia. E, aínda que ningún dos nosos castros está excavado e visible, podemos dicir que case todo o alumnado do cole visitou o Castro de Viladonga e/ou o Castro de Fazouro. Aquí debemos facer un apunte de agradecemento á implicación das familias, pois foron moitas as que aproveitaron as fins de semana e festivos para ir a coñecer algún dos castros da nosa comunidade; chegáronnos fotos de diversos lugares da xeografía galega. No cole recreamos castros, decoramos os edificios, traballouse a adquisición da lecto-escritura en infantil a partir de palabras relacionadas coa cultura castrexa, amasamos pan, investigamos sobre a canteiría, fixemos diccionarios... o dito, imposible resumilo todo. Grazas PDI 'Os Castros, un nome misterioso'

LOIS PÉREZ

 Lois Pérez, autor de dous libros protagonistas dos nosos clubes de lectura deste curso, visitou o noso cole o pasado 7 de maio.

Facía semanas que rematáramos de ler 'A tribo do mar', unha novela que trata moitos temas que nos fixeron reflexionar profundamente. Durante os encontros do club de lectura falamos sobre: emigración, desarraigo, loita, resiliencia, éxito, dificultades, etc. Sen dúbida foi unha novela dura pero que nos deixou ilusionados de cara ao futuro a través das súas personaxes, entre as que nos entusiasmou Alexandra.

Agora estamos inmersos na lectura de 'A gruta da torre' e entusiasmados porque é un libro moi divertido e que agocha un importante misterio.

Neste encontro literario con Lois Pérez, autor de ambos títulos. Tivemos a oportunidade de falar con el das súas novelas, de misterios, de anécdotas e incluso de amor. Pasámolo tan ben que se nos fixo curta a visita.

Grazas Lois, esperamos que volvas visitarnos pronto.

VISITOUNOS IRENE SAMPER

 Que afortunados fumos de recibir a Irene Samper, xogadora do Burela FSF o mércores 7 de maio. Unha gran deportista que nos deixou unha gran lección de vida. Chegou ao noso cole co sorriso na cara pola recente victoria do seu equipo na Copa da Raíña (e si, deixounos ver e tocar tódalas medallas).

Irene veu falarnos da súa vida como deportista da elite, dos seus triunfos (que non son poucos) e do seu día a día. 

con gran mestría explicounos o esforzo que hai detrás do éxito, as caídas, os disgustos, etc. Porque non sempre se gaña e hai que saber perder. Entendimos a importancia da saúde mental e da resiliencia, para o deporte, para os estudos e para a vida en xeral.

Grazas Irene por esta lección de vida! Grazas Bonitiño por invitala e ensinarnos tanto sobre a nosa saúde mental e  física.

LETRAS GALEGAS 2025

 No noso cole o festival de fin de curso vai sempre da man da celebración das letras galegas.

Este ano, adicado ás cantareiras, non podían faltar a música tradicional e as pandeiretas. Estamos moi agradecidos de poder contar no noso festival coa colaboración do grupo de cantareiras 'As Grileiras' pertencentes á asociación cultural Ledicia de Burela, Jose García (saxofonista e mestre en varias Escolas de Música) e Bruno Pedre (violonchelista e mestre).

Foi un gran festival no que disfrutamos moito e nos despedimos do noso alumnado de 6º curso que dentro de moi pouquiño comeza unha nova etapa e aos cales lles desexamos moita sorte. Durante o festival entregamos os premios á portada e á contraportada do noso xornal 'Nordés'  e tamén aproveitamos esta celebración tan emotiva para facerlles a entrega dun agasallo á nosa directora Pepa e á profe Pili que este ano se xubilan e ás que tamén lles desexamos o mellor.

Grazas Clink e Polos Creativos por estes pins tan fermosos que nos realizástedes para lucir no festival.

Fixéronse arredor de 300 pin-pandeiretas elaboradas coa impresora 3D de Polos Creativos grazas ao deseño de @a_fiestra_da_mestra e a axuda de @quenchofixo, en homenaxe ás nosas cantareiras.

ADESTRAMOS CON JAIRO CAMPO.

 'A tribo do mar' de Lois Pérez foi un libro que nos fixo alongar moito o club de lectura pois as temáticas e puntos de debate que ían xurdindo eran moitísimos.

Seguindo a historia de Alexandra, unha das personaxes protagonistas da novela, decidimos vivir coma ela o esforzo que supón entrenar e tomarse o deporte moi en serio.

Así que Bonitiño (sempre atento á nosa saúde) e Carmiña contactaron con Jairo Campo para que o noso alumnado do terceiro ciclo puidera vivir en primeira man un adestramento profesional de fútbol sala. 

Grazas Jairo Campo (adestrador da base feminina do Fútbol Sala de Burela) por facelo posible e ensinarnos tanto.

AQUELA VIAXE BONITIÑO, CARMIÑA E CLINK

 Parece que os nosos amigos Carmiña, Bonitiño e Clink souberon resolver con éxito as súas desavenencias e continuaron coa viaxe. Aquí os tedes en Viladonga. Unha visita inesquecible, aprenderían tanto coma o alumnado do cole dos Castros? Pronto o saberemos.

CLUBS DE LECTURA

 Os clubs de lectura principais deste segundo trimestre foron os celebrados ao redor dunha novela de Ledicia Costas titulada 'Conexión macarrón' e outra novela de Lois Pérez titulada 'A tribo do mar'. 

Ambos clubes se celebraron na biblioteca do centro aproveitando uns minutiños do tempo de lecer xunto coa hora de ler os martes e os mércores.

A experiencia foi fantástica nos dous clubes.  A novela de Ledicia Costas provocou moitas risas e falamos moito de: macarróns, utensilios de cociña, extraterrestres, amizades... e ata diseñamos un paraugas perfecto que gustase a tódolos nenos e nenas.

A novela de Lois levounos a falar de experiencias moi duras, de inmigración, das novelas epistolares e corais, do abuso, a crueldade, a esperanza, as dificultades e tamén a frivolidade. Pero como o personaxe que máis nos chegou ao corazón foi Alexandra pois iso deunos pé a falar moito de fútbol sala e das guerreiras laranxas da nosa vila, Burela. Aprendimos moitísimo dunha parte de África, do arquipélago de Cabo Verde, da ansiedade, os nervios e a autoesixencia. Sen dubida foi unha novela á que non foi doado chegar pero que deixou unha pegada importante en nos.

ANTROIDO

 Os Castrexos vivían en tribos. E nos preguntámonos se habería máis tribos por aí polo mundo. Atopamos moitas e tamén civilizacións das que nos falaron algúns compañeiros nosos; pois aquí non todos temos antergos castrexos e iso ábrenos ventás a aprender moitas cousiñas doutros mundos.

Pois así foi o noso Antroido este curso, un desfile espectacular no que recordamos como nos vestiamos cando eramos castrexos e tamén como son outras tribos e pobos.

DIA DA PAZ 2025

Celebrando o Día da Paz.

Para celebrar o Dia da Paza decidimos xuntarnos todo o alumnado e profesorado do cole para cantar, bailar e compartir tempo xuntos. Porque hai cousas que só son grandes se as facemos xuntos.

DIA DA PAZ 2025

OS CASTROS, UN NOME MISTERIOSO.

    As vacacións das nosas queridas mascotas non estaban a sair moi ben. Sen saber o que aconteceu finalmente, o noso alumnado falou e debatiu largo e tendido dos acontecementos que ocorreran nestas vacacións. 

    Tódalas aulas do cole analizaron os problemas que xurdían entre elas e propuxeron solucións a cada unha das dificultades de convivencia e problemas que xurdiran entre os tres amigos. Serían tan listas as nosas mascotas coma o noso alumnado? Pronto o saberemos.

   

AS VACACIÓNS QUE NON ESTABAN SAÍNDO COMO SE ESPERABA. CARMIÑA, BONITIÑO ...

OS CASTROS, UN NOME MISTERIOSO.

    Burela, a nosa vila, é ben fermosa. Nesta segunda parte do relato das vacacións das nosas mascotas podedes ver as súas primeiras decisións e os primeiros pasos desta interesante viaxe na que non deixaron de aprender.

    Os tres amigos percorreron a costa de Burela e outros barrios da nosa vila para que Clink coñecese moi ben o seu novo fogar. 

    Xa saben os tres moi ben onde se ubica o Castro de Burela, visitaron o Castro de Fazouro e decidiron continuar ata Viladonga, non sen antes parar en Mondoñedo. 

    Mais non todo estaba a sair segundo o planeado... e comezaron os problemas. E ti, como resolverías isto?