Despois dun curso no que descubrimos o motivo polo que ao noso cole, que se chamaba CEIPP Virxe do Carme, popularmente se lle coñecía como o colexio dos 'Castros', e de mergullarnos de cheo na cultura castrexa e no pasado da nosa vila, este anos decidimos entender mellor o noso presente.
Vivimos nunha Burela moi diferente á castrexa, unha Burela multicultural. Abarcar tódalas nacionalidades presentes na nosa vila é unha tarefa moi ambiciosa así que optamos por escoller entre aqueles lugares do mundo máis significativos para o noso alumnado e que teñen unha importante presencia en Burela. Foi así como xurdíu a idea de proxecto, para coñecer mellor os lugares de orixe dos nosos compis e/ou das súas familias. Queremos saber e queremos coñecer moitas cousiñas e escoitar moitas historias de países lonxanos. A través de este PDI "Burela sen fronteiras" coñeceremos diferentes aspectos da cultura de doce países. Durante este curso traballaremos seis de eles: España, Perú, Cabo Verde, Indonesia, Polonia e Ghana.
Agardamos que vos animedes a participar nas actividades que vaian xurdindo e que vos resulte interesante o noso traballo.
O 24 de outubro é o Día das bibliotecas, unha data moi especial.
Así que nos celebrámolo como ben merece. Presentamos o noso novo proxecto ao alumnado "Burela sen fronteiras", un proxecto que terá unha duración de dous cursos escolares. Tamén aproveitamos a efeméride para poñer a circular as mochilas viaxeiras e tódolos grupos visitan a nosa biblio para coñecer as sorpresas e novidades que lles ten preparadas Carmiña.
Non esquecemos o lema e, por suposto, unímonos á loita contra a desinformación, poñendo en valor os libros e os lugares que os acollen; sen esquecer a importancia do acceso á lectura e a poder/saber ler. Para isto axudounos durante esta xornada tan especial o libro "O lapis máxico de Malala".
As Bibliotecas Escolares son un latexo de vida nos centros e as Bibliotecas, en xeral, eternos refuxios de sabiduría, calma e esperanza. Uns lugares moi necesarios e cheíños de maxia como di esta canción de Iván Vale.
Aquí tedes o cartaz co lema das bibliotecas para esta celebración e o texto no blog de Bibliotecas Escolares con este motivo. Unha celebración que se está a facer dende o 1997.
Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas.
A Dirección Xeral do Libro, o Cómic e a Lectura, a través da Subdirección Xeral de Coordinación Bibliotecaria, impulsa a celebración do Día das Bibliotecas, este 24 de outubro de 2025.
O lema deste ano, "Contra a desinformación: bibliotecas", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.
As bibliotecas combaten a desinformación non só a través dos seus recursos, como as coleccións de libros e prensa ou as bases de datos, senón tamén a través dun uso adecuado das novas tecnoloxías. E, por encima de todo, as bibliotecas son un dique de contención contra a desinformación grazas ao seu persoal bibliotecario, que traballa como curador de contidos e apoio aos usuarios na procura de información a través de fontes fiables e contrastadas.
As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio, lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 2030 poñendo o foco en que ninguén das nosas comunidades educativas debe quedar atrás.
A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS.
Xa estamos enfrascados de cheo nunha nova aventura para este curso escolar 2025-2026 e dende aquí iremos compartindo coa nosa comunidade moitas das actividades e propostas nas que iremos traballando.
Carmiña despídese para gozar dun merecido descanso aínda que ela e os seus amiguiños Bonitiño e Clink xa andan a argallar cousiñas para o próximo curso. Que sorpresas nos traerán en setembro? Pronto o saberemos. Mais polo de pronto toca dar as grazas ao noso alumndado, profesorado e comunidade educativa por todo o traballo realizado ao redor do PDI 'Os Castros, un nome misterioso' e desexarlles moi felices vacacións para que veñan en setembro con moitas ganas e ilusión por aprender, de novo, todos xuntos.
Os últimos meses de curso ofertamos outros dous clubes de lectura ao noso alumnado. Un deles para traballar 'A marabillosa medicina de George' de Roald Dahl e outro foi 'A gruta da torre' de Lois Pérez.
Roald Dahl era un autor bastante descoñecido no noso cole. Sen embargo, dende que comezou a traballarse con el no club (e tamén se traballa a Dahl nas aulas de lingua estranxeira), o alumnado vaise achegando cada vez máis ás súas novelas, algo que pon a Carmiña moi leda pois é un autor con sona a nivel internacional.
O clube arredor do libro de Dahl produciu moitas risas e limos esceas das que non sabiamos que pensar, pois sentíamonos tanto sorprendidos como contentos. Esas emocións encontradas que tan ben sabe Dahl facernos sentir.
A Lois Pérez tivemos a fortuna de coñecelo e telo na nosa biblio. Tiñamos un montón de preguntas para el. O libro de 'A gruta da torre' estábanos gustando moito e, como a moitos non lles dera tempo de rematalo, queríamolo saber todo. Lois non defraudou e contounos de todo (ata un segredo que prometimos non dicir xamáis).
É moi difícil resumir con xustiza todo o traballo realizado ao redor do PDI e dos libros (por exemplo todo o traballo relacionado con Educación responsable) neste curso escolar. Quedan no recordo moitas LECTURAS COMPARTIDAS, entre o alumnado de diferentes niveis e tamén con outras asociacións, por exemplo as visitas que nos realizaron os usuarios da fundación EU SON, que visitaron o noso cole para compartir lecturas en máis de unha ocasión. E nós aínda temos pendente unha visita á Escola Infantil na que compartiremos lecturas cos máis pequeniños.
A aula de POLOS CREATIVOS encheuse de creatividade durante este curso, con actividades relacionadas con PDI e outras que non.
Paseamos moito. Fomos visitar AS TETAS DA VINCULEIRA, esas dúas mámoas que están aquí nos Castros moi pretiño do cole. Din que son a entrada ao Castro. vimos a PENA DO NENO e xa sabemos por que ao noso cole sempre se lle chamou o COLE DOS CASTROS.
Sabemos moito máis da nosa historia. E, aínda que ningún dos nosos castros está excavado e visible, podemos dicir que case todo o alumnado do cole visitou o Castro de Viladonga e/ou o Castro de Fazouro. Aquí debemos facer un apunte de agradecemento á implicación das familias, pois foron moitas as que aproveitaron as fins de semana e festivos para ir a coñecer algún dos castros da nosa comunidade; chegáronnos fotos de diversos lugares da xeografía galega. No cole recreamos castros, decoramos os edificios, traballouse a adquisición da lecto-escritura en infantil a partir de palabras relacionadas coa cultura castrexa, amasamos pan, investigamos sobre a canteiría, fixemos diccionarios... o dito, imposible resumilo todo. Grazas PDI 'Os Castros, un nome misterioso'
Como é posible que lográsemos facer este proxecto tan chulo? Pois con moito traballo, esforzo e ilusión. Moitas grazas nenos e nenas do cole dos castros, plantilla de mestres e familias 💖
Lois Pérez, autor de dous libros protagonistas dos nosos clubes de lectura deste curso, visitou o noso cole o pasado 7 de maio.
Facía semanas que rematáramos de ler 'A tribo do mar', unha novela que trata moitos temas que nos fixeron reflexionar profundamente. Durante os encontros do club de lectura falamos sobre: emigración, desarraigo, loita, resiliencia, éxito, dificultades, etc. Sen dúbida foi unha novela dura pero que nos deixou ilusionados de cara ao futuro a través das súas personaxes, entre as que nos entusiasmou Alexandra.
Agora estamos inmersos na lectura de 'A gruta da torre' e entusiasmados porque é un libro moi divertido e que agocha un importante misterio.
Neste encontro literario con Lois Pérez, autor de ambos títulos. Tivemos a oportunidade de falar con el das súas novelas, de misterios, de anécdotas e incluso de amor. Pasámolo tan ben que se nos fixo curta a visita.
Grazas Lois, esperamos que volvas visitarnos pronto.
Que afortunados fumos de recibir a Irene Samper, xogadora do Burela FSF o mércores 7 de maio. Unha gran deportista que nos deixou unha gran lección de vida. Chegou ao noso cole co sorriso na cara pola recente victoria do seu equipo na Copa da Raíña (e si, deixounos ver e tocar tódalas medallas).
Irene veu falarnos da súa vida como deportista da elite, dos seus triunfos (que non son poucos) e do seu día a día.
con gran mestría explicounos o esforzo que hai detrás do éxito, as caídas, os disgustos, etc. Porque non sempre se gaña e hai que saber perder. Entendimos a importancia da saúde mental e da resiliencia, para o deporte, para os estudos e para a vida en xeral.
Grazas Irene por esta lección de vida! Grazas Bonitiño por invitala e ensinarnos tanto sobre a nosa saúde mental e física.
A Real Academia Galega acordou dedicar o Día das Letras Galegas 2025 á poesía popular oral, personificado en Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema, Teresa García Prieto e Prudencia e Asunción Garrido Ameixenda, integrantes estas catro das Pandeireteiras de Mens (Malpica).
É unha celebración colectiva, con ela quérese recoñecer a importancia da poesía popular oral, que nos leva acompañando dende sempre, e facéndoa presente noutras figuras máis recentes como Mercedes Peón, o grupo Leilía, Xabier Díaz e as Abufeiras ou as Tanxugueiras.
O grupo de cantareias 'As Grileiras', pertencentes á asociación cultural Ledicia de Burela, visitaron o noso colexio durante dúas xornadas inesquecibles. A temática das letras galegas fixéronnos querer saber máis destas mulleres, as cantareiras, que ao longo dos anos foron transmisoras e conservadoras da lírica oral e da nosa tradición popular. Un traballo e unha labor que se veu recoñecida este 17 de maio.
As Grileiras: Maite, Marta e Lola estiveron con todo o alumnado do noso cole durante dúas xornadas moi intensas e trouxeron con elas un legado que nos souberon transmitir con moito cariño. Faláronnos: das cantareiras, da súa labor, das recollidas, do traxe tradicional galego, dos instrumentos e moitas cousas máis. Tivemos a oportunidade de escoitalas e de cantar con elas. Incluso de crear unha copla de despedida!
Grazas Grileiras por esta visita que nos encheu os corazóns.
.jpeg)
.jpeg)
.jpeg)
.jpeg)
